***

Ey,

Mening nigohimga dosh berolmas qiz,

Ko’zlarin yashirgan, yuzi qizargan.

Sening hayajoning emasdir bejiz,

Mening ko’ksimda ham nedir ko’kargan.

Ey,

Kunduz so’zlarimni tinglamay, qochib,

Tunda she’rlarim yod olguvchi jonon.

Sevgim izhor aylay ko'nglimni ochib,

Lahzalik suhbat chun hadya et imkon.

Ey,

Ro’baru kelganda banddek, shoshgandek,

Ko’rmagandek o’zni tutguvchi dilbar.

Yashirma! Sezilar - nashtar botgandek

Sening dilingni ham tuyg’ular o’rtar.

Ey,

Ishq haqda o’yni ham nomus deb bilgan,

Hayosi xayoldan ustunroq sanam.

Rahm et qalbingga - sevgi in qurgan,

Axir, muhabbatga oshnosan sen ham...

...Ey,

Mendan-da qo’rqoqroq, mendan-da ojiz,

Hislarin oshkora etolmas xilqat.

Axir hayajoning emasdir bejiz,

Ishqimni rad etma, iltifot ko’rsat.

Ishqingni rad etma, iltifot ko’rsat.

***

Умрим менинг, пешонамга ўйиб-ўйиб
Ёзилгандинг.
Келишмадик ўзинг билан.
Сен узоқроқ яшамоқчи эдинг тўйиб, 
Мен баxтлироқ.
Сўнг қолдирдинг ўзим билан.

Мен баxт дедим,
Шошдим - сендан олдинроққа ўтиб кетдим.
Пешонамдан ёзувларим ўчиб кетди,
Имонларим тўкилдилар - 
Оёқларим остларига сочиб кетдим,
Ишончлардан, эътиқоддан қочиб кетдим.

Бойлик бўлиб, жонон бўлиб, бода бўлиб
Пайдо бўлди баxтим менинг.
Мен уларга шайдо бўлдим.
Ақлим менинг,
Қалбим менинг,
Руҳим менинг,
Таним менинг - 
Лаззатлар-ла ошно бўлди,
Лаззатларга гадо бўлди,
Лаззатлардан адо бўлди,
Расво бўлди...
Расво бўлди!

Бу тафовуд қаердан ҳам пайдо бўлди - 
Сен узоқроқ бормоқчийдинг,
Мен-чи тезроқ.
Кўп шошилдим - манзилимга етиб қолдим,
Ортда қолдинг, боқсам - ора жуда узоқ,
Сендан олдин - вақтдан олдин
Қариликка ўтиб қолдим.

Эй, воҳ, дўстлар даврасида
Энди бирор суҳбатдош йўқ,
Фикри, ўйи, xаёлоти
Ўxшаш бўлган бирор бош йўқ.
Ёронларнинг орасида 
Туриб ўзни ёлғиз сезсанг
Бундан оғир азоб йўғ-у,
Бунга чидовчи бардош йўқ...

..Лаззатни баxт дея билиб
Зўр адашдим,
Ҳаддан ошдим,
Жуда шошдим.

Жуда шошдим -
Сендан олдин - вақтдан олдин
Дунёдаги бор лаззатга етиб бўлдим,
Дунёдаги бор лаззатни тотиб бўлдим,
Сўнгги қатла "баxт"имни ҳам ютиб бўлдим.

Энди ҳечам -
Яшаш учун тополмайман эрмагимни.
Ўлмоқ бўлсам -
Инкор этди,
Абгор этди истагимни 
Азроил ҳам.

Жисмим ботқоқ - жоним унга ботиб қолди,
Руҳим унда қотиб қолди.
Танамдаги руҳим билан,
Жоним билан
Тупроқларнинг остларига ётиб олдим,

Баxт бу - лаззат, дея ўйлаб,
Кўпроқ лаззат орзу айлаб,
Тезроқ лаззат орзу айлаб,
Шошилётган гумроҳларнинг
Оёқлари остларига ётиб олдим -

Энди шу ер қабрим менинг
Ортда қолган умрим менинг,
О, ягона дардим менинг!
Сен энг олий гардим менинг...


***
Umrim mening, peshonamga o'yib-o'yib
Yozilganding.
Kelishmadik o'zing bilan.
Sen uzoqroq yashamoqchi eding to'yib, 
Men baxtliroq.
So'ng qoldirding o'zim bilan.

Men baxt dedim,
Shoshdim - sendan oldinroqqa o'tib ketdim.
Peshonamdan yozuvlarim o'chib ketdi,
Imonlarim to'kildilar - 
Oyoqlarim ostlariga sochib ketdim,
Ishonchlardan, e'tiqoddan qochib ketdim.

Boylik bo'lib, jonon bo'lib, boda bo'lib
Paydo bo'ldi baxtim mening.
Men ularga shaydo bo'ldim.
Aqlim mening,
Qalbim mening,
Ruhim mening,
Tanim mening - 
Lazzatlar-la oshno bo'ldi,
Lazzatlarga gado bo'ldi,
Lazzatlardan ado bo'ldi,
Rasvo bo'ldi...
Rasvo bo'ldi!

Bu tafovud qayerdan ham paydo bo'ldi - 
Sen uzoqroq bormoqchiyding,
Men-chi tezroq.
Ko'p shoshildim - manzilimga yetib qoldim,
Ortda qolding, boqsam - ora juda uzoq,
Sendan oldin - vaqtdan oldin
Qarilikka o'tib qoldim.

Ey, voh, do'stlar davrasida
Endi biror suhbatdosh yo'q,
Fikri, o'yi, xayoloti
O'xshash bo'lgan biror bosh yo'q.
Yoronlarning orasida 
Turib o'zni yolg'iz sezsang
Bundan og'ir azob yo'g'-u,
Bunga chidovchi bardosh yo'q...

..Lazzatni baxt deya bilib
Zo'r adashdim,
Haddan oshdim,
Juda shoshdim.

Juda shoshdim -
Sendan oldin - vaqtdan oldin
Dunyodagi bor lazzatga yetib bo'ldim,
Dunyodagi bor lazzatni totib bo'ldim,
So'nggi qatla "baxt"imni ham yutib bo'ldim.

Endi hecham -
Yashash uchun topolmayman ermagimni.
O'lmoq bo'lsam -
Inkor etdi,
Abgor etdi istagimni 
Azroil ham.

Jismim botqoq - jonim unga botib qoldi,
Ruhim unda qotib qoldi.
Tanamdagi ruhim bilan,
Jonim bilan
Tuproqlarning ostlariga yotib oldim,

Baxt bu - lazzat, deya o'ylab,
Ko'proq lazzat orzu aylab,
Tezroq lazzat orzu aylab,
Shoshilyotgan gumrohlarning
Oyoqlari ostlariga yotib oldim -

Endi shu yer qabrim mening
Ortda qolgan umrim mening,
O, yagona dardim mening!
Sen eng oliy gardim mening...

***

Азоб нима?
Азоб бу - ярим тунда
Уxлаб ётганингда, тушингда қувса
Қандайдир таҳлика, қўрқинч. Ва шунда
Қочмоқ истасанг-у, қаттиқ югурсанг,

Аммо жилолмасанг турган ерингдан.
Бўғзингни бўғизлаб қўйса бир xалқоб -
Бақира олмасанг.
Ҳатто тушингдан
Уйғона олмасанг.
Мана шу - азоб.

Азоб нима?
Азоб бу - ярим тунда
Борлиқни унутиб, тинчгина ётиб
Уxлашни xоҳласанг, истасанг шундай...
Ва лек оромингни қўйсанг йўқотиб.

Соатлаб ётсанг.
Сўнг турсанг ўрнингдан,
Бурчакдан бурчакка қилганча шитоб
Юрсанг, юраверсанг.
Уйқусизликдан
Бошинг қизиб кетса.
Мана шу - азоб.

17.05.2016

***

Қимтиниб турасан қаршимда беун,
Ёшингни ютасан кўзларинг билан.
Секин сўз бошлайсан : "Билмадим нечун
Сизга ошно бўлдим ҳисларим билан.

Мен ҳеч истамасдим қайсидир эркак
Мени ўзлигига айлаб маҳлиё,
Қалбим забт этишин. Сўнг бўлиб эрмак
Ҳислар қуршовида қолсам бенаво..."

Бир зум тин оласан. Ташлайсан назар
Кўзимга. Сўнг лаънат ўқийсан менга
Англаб саволимни (қиласан ҳазар) - 
"Истамас экансан, келгандинг нега?"

"Аммо сиз, билмадим қандай куч билан
Қандай бир илоҳий сеҳр билан ё,
Ўргатиб олдингиз қалбимни тўла,
Меҳрли нигоҳ-ла қилдингиз шайдо.

Ҳа, мен ўзим сизга бўлгандим иқрор,
Ўзим қошингизга келгандим, дастлаб.
Ўзим қилган эдим дилимни изҳор,
Сиздан муҳаббатни қилгандим талаб.

Эй воҳ, мен ёш эдим, содда, нотавон
(Нечун ҳозиргидек эмасдим аввал?!)
Кўнгилга қул бўлдим ва сизга жонон,
Ақлга бегона, дардда бемаҳал.

О, унда қанчалар нодон эканман,
Сиздан муҳаббатни қилибман орзу.
Кеч билдим: зарра йўқ сизда севгидан,
Севгимас сиздаги ҳеч қайси туйғу!

Сизда эҳтирос бор, лек у ишқ эмас,
Меҳр бор, муҳаббат эмас у аммо.
Изҳорларни қабул айлайсиз бесас,
Кетсалар тўxтатиб қолмайсиз, асло.

Сиз на тош, на инсон, на бир мавжудод,
Янглишдан яратган сизни табиат.
Сиз учраган кунга лаънатлар минг бод,
Сизга тушган ишққа бўлсин минг лаънат!..."

Сўзларинг ўтади ташлаб ненидир,
Ненидир ифода этолмас калом.
Дудоғинг титрайди бемажол, оғир:
"Бошқа учрашмаймиз... 
Айромиз... 
Тамом..."

Назар ташламайсан кўзимга қайтиб, 
Биласан - саволдан тўла нигоҳим.
Сўнгги сўзларингни шивирлаб айтиб,
Секин буриласан. Мен қоламан жим.

Узоқлаб борасан, қилмайсан шитоб,
Синггишиб борасан қоп-қора тунга.
Саволим дийдамда қолар бежавоб -
"Истамас экансан, кетасан нега?"

"Истамас экансан, кетяпсан нега...?"

12.05.2016

***

Qimtinib turasan qarshimda beun,
Yoshingni yutasan ko'zlaring bilan.
Sekin so'z boshlaysan : "Bilmadim nechun
Sizga oshno bo'ldim hislarim bilan.

Men hech istamasdim qaysidir erkak
Meni o'zligiga aylab mahliyo,
Qalbim zabt etishin. So'ng bo'lib ermak
Hislar qurshovida qolsam benavo..."

Bir zum tin olasan. Tashlaysan nazar
Ko'zimga. So'ng la'nat o'qiysan menga
Anglab savolimni (qilasan hazar) - 
"Istamas ekansan, kelganding nega?"

"Ammo siz, bilmadim qanday kuch bilan
Qanday bir ilohiy sehr bilan yo,
O'rgatib oldingiz qalbimni to'la,
Mehrli nigoh-la qildingiz shaydo.

Ha, men o'zim sizga bo'lgandim iqror,
O'zim qoshingizga kelgandim, dastlab.
O'zim qilgan edim dilimni izhor,
Sizdan muhabbatni qilgandim talab.


Ey voh, men yosh edim, sodda, notavon
(Nechun hozirgidek emasdim avval?!)
Ko'ngilga qul bo'ldim va sizga jonon,
Aqlga begona, dardda bemahal.

O, unda qanchalar nodon ekanman,
Sizdan muhabbatni qilibman orzu.
Kech bildim: zarra yo'q sizda sevgidan,
Sevgimas sizdagi hech qaysi tuyg'u!

Sizda ehtiros bor, lek u ishq emas,
Mehr bor, muhabbat emas u ammo.
Izhorlarni qabul aylaysiz besas,
Ketsalar to'xtatib qolmaysiz, aslo.

Siz na tosh, na inson, na bir mavjudod,
Yanglishdan yaratgan sizni tabiat.
Siz uchragan kunga la'natlar ming bod,
Sizga tushgan ishqqa bo'lsin ming la'nat!..."

So'zlaring o'tadi tashlab nenidir,
Nenidir ifoda etolmas kalom.
Dudog'ing titraydi bemajol, og'ir:
"Boshqa uchrashmaymiz... 
Ayromiz... 
Tamom..."

Nazar tashlamaysan ko'zimga qaytib, 
Bilasan - savoldan to'la nigohim.
So'nggi so'zlaringni shivirlab aytib,
Sekin burilasan. Men qolaman jim.

Uzoqlab borasan, qilmaysan shitob,
Singgishib borasan qop-qora tunga.
Savolim diydamda qolar bejavob -
"Istamas ekansan, ketasan nega?"


"Istamas ekansan, ketyapsan nega...?"

12.05.2016

***

Тунда уйқуларим уйқуга кетди
Ва мен ёлғиз қолдим ёлғиз xонамда.
Шу тун оромимнинг баҳридан ўтдим,
Xаёл қилмоқ бўлдим сени - ёнимда.

Турдим. Xаёлларим xаёлга чўмди,
Беришмади сени ўйлашга имкон.
Барча xотирамни зулматга кўмдим,
Ортда бўм-бўш умр бўлди намоён.

Тикилдим ортимга, билмам қанча дам,
Бўшлиққа термулиб зерикиш оғир.
Ва оxир зерикдим зерикишлардан,
Қўмсамоқ истадим қаттиқ ненидир.

Соғинчга арзирли оғриқларимни
Изладим, топмадим.. Қандай жазо бу?!
Соғинчим соғинди соғинчларимни,
Мен-чи, соғинишсиз қолдим - азоб бу..

Ҳисларим ўзларин этдилар такрор,
Мени менсизликда кетдилар ташлаб.
Ортиқ
Келолмайман сени ўйимга бошлаб -
Сен ҳам сенлигингни йўқотдинг, дилдор..

05.03.2016.
Тонг, 05:23

***
Tunda uyqularim uyquga ketdi
Va men yolg'iz qoldim yolg'iz xonamda.
Shu tun oromimning bahridan o'tdim,
Xayol qilmoq bo'ldim seni - yonimda.

Turdim. Xayollarim xayolga cho'mdi,
Berishmadi seni o'ylashga imkon.
Barcha xotiramni zulmatga ko'mdim,
Ortda bo'm-bo'sh umr bo'ldi namoyon.

Tikildim ortimga, bilmam qancha dam,
Bo'shliqqa termulib zerikish og'ir.
Va oxir zerikdim zerikishlardan,
Qo'msamoq istadim qattiq nenidir.

Sog'inchga arzirli og'riqlarimni
Izladim, topmadim.. Qanday jazo bu?!
Sog'inchim sog'indi sog'inchlarimni,
Men-chi, sog'inishsiz qoldim - azob bu..

Hislarim o'zlarin etdilar takror,
Meni mensizlikda ketdilar tashlab.
Ortiq
Kelolmayman seni o'yimga boshlab -
Sen ham senligingni yo'qotding, dildor..

05.03.2016.
Tong, 05:23