***

Биз лаҳзалар яратдик бирга,
Йўлларимиз туташди бир дам.
Ва бир муддат айландик сирга -
Ҳеч ким билмас, нафис ва кўркам.

Босиб ўтдик қанча қувончни,
Баъзан дардлар яраладилар.
Xавф остига қўйиб ишончни
Сўнг шубҳалар ораларидан.

Йўқ, бу шубҳа ишққа эмасди,
Муҳаббатга эмасди, асло.
Фақат сенинг кўзинг етмасди
Мен-ла тўкис ҳаётга. Илло -

Сен шаҳарнинг нозик малаги,
Мен дағал жон - қишлоқда ўсган.
Тисарилди ортга юрагинг,
Қийинчилик - ороминг бузган. 

Бу ҳаммаси эмасди, яна
Мен бой эмас, эдим ўртаҳол.
Бўлолмасдим моддий бошпана
Барча истагингга, эҳтимол.

Кўп ўйладинг, эзилдинг - билдим,
Зирқиради ич-ичинг оғир.
Ваъда қилди тўкислик кимдир
Ва сен уни танладинг оxир.

Тушунаман барини, жонон,
Тўкин ҳаёт сенга маъқулроқ.
Аxир севги бойликдан ёмон,
Аxир севги мансабдан пастроқ.

Шундай битди қиссамиз узун...
...Пичирлайди кимдир - "Минг лаънат,
Энди бойлик севгидан устун,
Шу аҳволга келган жамият!"

03.03.2017

***

Biz lahzalar yaratdik birga,
Yo'llarimiz tutashdi bir dam.
Va bir muddat aylandik sirga -
Hech kim bilmas, nafis va ko'rkam.

Bosib o'tdik qancha quvonchni,
Ba'zan dardlar yaraladilar.
Xavf ostiga qo'yib ishonchni
So'ng shubhalar oralaridan.

Yo'q, bu shubha ishqqa emasdi,
Muhabbatga emasdi, aslo.
Faqat sening ko'zing yetmasdi
Men-la to'kis hayotga. Illo -

Sen shaharning nozik malagi,
Men dag'al jon - qishloqda o'sgan.
Tisarildi ortga yuraging,
Qiyinchilik - oroming buzgan. 

Bu hammasi emasdi, yana
Men boy emas, edim o'rtahol.
Bo'lolmasdim moddiy boshpana
Barcha istagingga, ehtimol.

Ko'p o'ylading, ezilding - bildim,
Zirqiradi ich-iching og'ir.
Va'da qildi to'kislik kimdir
Va sen uni tanlading oxir.

Tushunaman barini, jonon,
To'kin hayot senga ma'qulroq.
Axir sevgi boylikdan yomon,
Axir sevgi mansabdan pastroq.

Shunday bitdi qissamiz uzun...
...Pichirlaydi kimdir - "Ming la'nat,
Endi boylik sevgidan ustun,
Shu ahvolga kelgan jamiyat!"


03.03.2017