Ruhiy buzulish

Menmi? - Yashayapman, zo`r, binoidek,
Ruhim bilan birga ulg`aydik biroz.
Oldin hirslarimga yuz burar edik,
Endi qilmayapmiz, aslo, e'tiroz.


Menmi? - Senga o`xshab qolganman tamom,
Sening sharofating, ha, sharofating - 
Voz kechishing meni saqladi omon,
Balki xor qilardi zo`r sadoqating.


Menmi? - Hozir mening mansabim ham bor,
Ko`rsa hasadgo`ylar o`tirolmas tinch.
Do`stimni kuttirmay qilmayman diydor,
Axir, endi vaqtim - tig`iz, tiqilinch!


Menmi? - Yolg`onda ham "Pir" bo`lib qoldim,
Inson alday olsa - inson, aslida!
Soxta iltifot-la ko`ngillar oldim,
Samimiy yig`lab ham qo`ydim ba'zida.

Menmi? - Ifloslikdan tonmayman, aslo,
Bo`lsin deb rohatim mukammal, beranj.
Hirsni qondirmoqlik yoqimli, illo,
Shuncha, usul qancha bo`lsa gar jirkanj!

Menmi? - Lazzatlarga botib ketganman,
Har tun quchog`imda to`lg`onar jonon.
Barcha gunohlarni bosib o`tganman,
Yagona qolgani - o`ldirmoq inson!

Menmi? - Qotillik ham qilarman balki:
Alamdan bo`g`ilib ketganda bo`g`zim
Shart bo`g`ib qo`yaman o`zingni! Yoki
Bo`g`izlab qo`yaman o`zimni o`zim!

2013.

***
Руҳий бузулиш

Менми? - Яшаяпман, зўр, биноидек,
Руҳим билан бирга улғайдик бироз.
Олдин ҳирсларимга юз бурар эдик,
Энди қилмаяпмиз, асло, эътироз.


Менми? - Сенга ўxшаб қолганман тамом,
Сенинг шарофатинг, ҳа, шарофатинг - 
Воз кечишинг мени сақлади омон,
Балки xор қиларди зўр садоқатинг.


Менми? - Ҳозир менинг мансабим ҳам бор,
Кўрса ҳасадгўйлар ўтиролмас тинч.
Дўстимни куттирмай қилмайман дийдор,
Аxир, энди вақтим - тиғиз, тиқилинч!


Менми? - Ёлғонда ҳам "Пир" бўлиб қолдим,
Инсон алдай олса - инсон, аслида!
Соxта илтифот-ла кўнгиллар олдим,
Самимий йиғлаб ҳам қўйдим баъзида.

Менми? - Ифлосликдан тонмайман, асло,
Бо`лсин деб роҳатим мукаммал, беранж.
Ҳирсни қондирмоқлик ёқимли, илло,
Шунча, усул қанча бўлса гар жирканж!

Менми? - Лаззатларга ботиб кетганман,
Ҳар тун қучоғимда тўлғонар жонон.
Барча гуноҳларни босиб ўтганман,
Ягона қолгани - ўлдирмоқ инсон!

Менми? - Қотиллик ҳам қиларман балки:
Аламдан бўғилиб кетганда бўғзим
Шарт бўғиб қўяман ўзингни! Ёки
Бўғизлаб қўяман ўзимни ўзим!

2013.

Rangsiz she`r

I
Bor edi shunday odatim:
Qayda suluv qiz uchratdim,
Ismlarin so`rab barin,
Qizga o`ch telba singari
Tuzar edim ro`yxatini.
"Topsam qulay fursatini
Birortasin surishtirib
Olaman, - deb, - xotin qilib".

Endi yurak jiz etmaydi,
Hayajonni his etmaydi,
Go`zallarni ko`rganimda.
Bittasiga o`rgandim-da..
O`zgardimmi? O`zgardimi!
O`zgarganim sezib qo`ydim.
Olib o`sha dil xatini - 
Suluvlarning ro`yxatini,
Ismlarning barchasiga
Qalam bilan chizib qo`ydim.

II
So`ng maqsadlar kurtakladi,
"Buyuklik"ka yetakladi.
Xayol qildim: Tirishaman,
Barchasiga erishaman!
Lekin yolg`iz qiyin ekan,
Kurash - g`irrom o`yin ekan,
Silkitishdi, tortqilashdi,
O`say desam chopqilashdi.

Bildim - yordam, himmat kerak,
Bir yelkadosh ulfat kerak.
Do`stim, dedim, do`stim dedim,
Eplolmayman o`zim, dedim.
"Qo`lingni cho`z imkon bo`lsa!"
Eshitmadi biror kimsa.
Ulfatimdan, do`stlarimdan
Umidimni uzib qo`ydim.
So`ng to`satdan qoqildim-da,
Shunday yomon yiqildam-da -
Maqsadlarim sinib ketdi,
Barchasini buzib qo`ydim.

III
Maqsadsiz tan daydi ekan,
Umrning zo`r hayfi ekan.
Loy ko`chada, chang ko`chada,
Tor ko`chada, tang ko`chada
Kezaverdim, sudraklandim,
Sang`iyverdim har kechada.
Emakladim, ermaklandim,
Kaltakladim, kaltaklandim.
Zo`r dars bo`ldi har bir zarba
Yigitlikdan erkaklandim.
Ko`chalarda daydib-daydib,
Tushunishning kelib payti
O`zligimga intildim-da,
Turib oldim yana qaytib.

Do`stim, endi chalma faqat,
Birlashishga kelgan fursat.
Hasadingni yig`ishtir, bas,
Yurtdoshmiz-ku, dushman emas!
O`z sirimni senga aytay,
Eshitib, so`ng kulma atay:
Yetuklikka yetaklovchi 
Maqsadlarni tuzib qo`ydim.
Kel, yo`limda hamrohim bo`l,
Kuchli bo`lsang panohim bo`l!
Yelkadoshlar qatoriga
Men seni ham yozib qo`ydim.

24.05.2015

Da`vo

Singlim, endi o`lmasam kerak,
Ular menga shunday deyishdi.
Avval yuragimni yeyishdi
(Men-chi og`riq bilmasam kerak) -

Qonlar chiqdi ko`ksimdan oz-oz,
Qog`oz bilan qalbimni to`sdim.
"Endi aslo o`lmaysan, do`stim!"
Deyishdi so`ng.

                      Men-chi e`tiroz
Bildirmadim. Bildirolmadim.
Qonlar oqdi, qonga qo`shilib
Tuyg`u, hislar oqdi, ko`pirib
Oqaverdi. Ko`ndirolmadim

Oqmaslikka. Lavhlarni faqat
Bosaverdim ko`ksimga qattiq.
Jismim og`riq sezmadi, aniq,
Lekin onggim so`radi shafqat -

Og`ridi u, azoblandi u.
- To`xtat, - dedi, - tuyg`ularingni!
Yo bo`g`zingga tort xanjaringni
Va birga o`l! - g`azablandi u.

O`lolmadim, o`lmadim, hecham,
Qon aralash hislar to`kilgan
Qog`ozlarga (g`ijim, bukilgan)
To`lib ketdi tonggacha xonam.

Tongda keldi ular qaytadan,
Qog`ozlarni ko`rdi birma-bir.
Biri dedi qilganday shivir:
"Do`stim, senga bir sir aytaman - 
Endi sening umring boqiydir!
Men-chi sherigim-la qaytaman".

Hislar, qonlar, ishqlar to`kilgan,
G`ijimlangan, qattiq bukilgan
Qog`ozlarni oldim-da barin
Qimmatbaho buyum singari
Saqlab qo`ydim.

                        Boshim egilgan
Faqat onggim oldida bu kun,
Sodiqlikda bo`lolmay qat`iy
Hislarimni qalbda abadiy
Saqlab qola olmaganim chun.

Singlim, yuragimni yeyishdi
(Men-chi og`riq bilmasam kerak),
Endi aslo o`lmasam kerak!
Ular menga shunday deyishdi..

Kyoto, 22.05.2015.

***
Даъво

Синглим, энди ўлмасам керак,
Улар менга шундай дейишди.
Аввал юрагимни ейишди
(Мен-чи оғриқ билмасам керак) -

Қонлар чиқди кўксимдан оз-оз,
Қоғоз билан қалбимни тўсдим.
"Енди асло ўлмайсан, дўстим!"
Дейишди сўнг.

                          Мен-чи эътироз
Билдирмадим. Билдиролмадим.
Қонлар оқди, қонга қўшилиб
Туйғу, ҳислар оқди, кўпириб
Оқаверди. Кўндиролмадим

Оқмасликка. Лавҳларни фақат
Босавердим кўксимга қаттиқ.
Жисмим оғриқ сезмади, аниқ,
Лекин онггим сўради шафқат -

Оғриди у, азобланди у.
- Тўxтат, - деди, - туйғуларингни!
Ё бўғзингга торт xанжарингни
Ва бирга ўл! - ғазабланди у.

Ўлолмадим, ўлмадим, ҳечам,
Қон аралаш ҳислар тўкилган
Қоғозларга (ғижим, букилган)
Тўлиб кетди тонггача xонам.

Тонгда келди улар қайтадан,
Қоғозларни ко`рди бирма-бир.
Бири деди қилгандай шивир:
"Дўстим, сенга бир сир айтаман - 
Энди сенинг умринг боқийдир!
Мен-чи шеригим-ла қайтаман".

Ҳислар, қонлар, ишқлар тўкилган,
Ғижимланган, қаттиқ букилган
Қоғозларни олдим-да барин
Қимматбаҳо буюм сингари
Сақлаб қўйдим.

                            Бошим эгилган
Фақат онггим олдида бу кун,
Содиқликда бўлолмай қатъий
Ҳисларимни қалбда абадий
Сақлаб қола олмаганим чун.

Синглим, юрагимни ейишди
(Мен-чи оғриқ билмасам керак),
Энди асло ўлмасам керак!
Улар менга шундай дейишди..

Кёто, 22.05.2015.

***

Qo'limni tekkazdim - to'kildi yaproq,
Yig'ladi beozor bahor: "Ketaman!".
Qolgin, deb o'tinmoq bo'ldim-u, biroq
O'zni xo'rlab, uni aldab netaman..
Garchi o'zimning ham tan olgim kelmas,
Lek kuzni sevaman, bahorni emas.

She'rimni o'qidi - jilmaydi onam,
"Kim ekan u dildor?", - so'ng kuldi aniq.
"Bechora bolam-a, devona bolam.."
Bu hazil qalbimda uyg'otdi sanchiq.
Eh, onam bilmaydi, eh, onam bilmas:
Men she'rni sevaman, dildorni emas..

Adirda ingradim nayga qo'shilib,
Atrofda yangradi baxtning dutori.
"Men-la yur!", - baxt keldi sekin suzilib,
Lek menda u emas, g'amning xumori -
Balki kimlar kular, ehtimol kulmas.
Men nayni sevaman, dutorni emas.

Boshimga tosh bo'lib to'kildi yomg'ir,
G'am xumor qilmoqda deganim chunmi?!
Yig'ladim..ne uchun kulayin, axir,
Tosh yutib yashnagan maysa uchunmi?
Yo Rab! Sinovingga bardoshim yetmas,
Men g'amni sevaman, ozorni emas..

Arxivdan.

***
Қўлимни текказдим - тўкилди япроқ,
Йиғлади беозор баҳор: "Кетаман!".
Қолгин, деб ўтинмоқ бўлдим-у, бироқ
Ўзни xўрлаб, уни алдаб нетаман..
Гарчи ўзимнинг ҳам тан олгим келмас,
Лек кузни севаман, баҳорни эмас.

Шеъримни ўқиди - жилмайди онам,
"Ким экан у дилдор?", - сўнг кулди аниқ.
"Бечора болам-а, девона болам.."
Бу ҳазил қалбимда уйғотди санчиқ.
Эҳ, онам билмайди, эҳ, онам билмас:
Мен шеърни севаман, дилдорни эмас..

Адирда инградим найга қўшилиб,
Атрофда янгради баxтнинг дутори.
"Мен-ла юр!", - баxт келди секин сузилиб,
Лек менда у эмас, ғамнинг xумори -
Балки кимлар кулар, эҳтимол кулмас.
Мен найни севаман, дуторни эмас.

Бошимга тош бўлиб тўкилди ёмғир,
Ғам xумор қилмоқда деганим чунми?!
Йиғладим..не учун кулайин, аxир,
Тош ютиб яшнаган майса учунми?
Ё Раб! Синовингга бардошим етмас,
Мен ғамни севаман, озорни эмас..

Арxивдан.

Istisno

Ona, sakuralar gullabdi bugun,
Sakura degani bizdagi gilos.
Guli xuddi o'zi, tani ham mahzun,
Faqat mevasini yeb bo'lmas, xolos.

Ona, sog'-omonman, baquvvat jismim,
Do'stlarim "Bekasal", - deya kuladi.
Faqat chap ko'ksimning quyiroq qismi
Gohida ozgina sanchib turadi.

Ona, yapon qizlar shunday maftunkor,
Tabiat ziloldek tiniq yuz bergan.
Faqat kichkina bir kamchiligi bor:
Bizning qizlar o'rnin bosolmas ekan.

Ona, bu millatning hurmati cheksiz,
Kelganlar minnatdor bo'lmay ketmaydi.
Faqat ular bilan suhbatlashsangiz
Mehrga o'xshagan nedir yetmaydi.

Ona, men moslashdim, uyqim bexalal,
Hatto tush ko'ryapman, ishonasizmi!
Faqat xorijlarni ko'rardim avval,
Endi ko'rayapman qishlog'imizni..

Ona, sakuralar gullagan ekan,
Sakura degani bizdagi gilos.
Faqat mevasini yeb bo'lmas ekan,
Guliga tikilsa bo'larkan, xolos.

Guliga termulsa bo'larkan, xolos..


Yaponiya, Kyoto, 2015-yil mart oyining oxirlari.

***
Истисно

Она, сакуралар гуллабди бугун,
Сакура дегани биздаги гилос.
Гули xудди ўзи, тани ҳам маҳзун,
Фақат мевасини еб бўлмас, xолос.

Она, соғ-омонман, бақувват жисмим,
Дўстларим "Бекасал", - дея кулади.
Фақат чап кўксимнинг қуйироқ қисми
Гоҳида озгина санчиб туради.

Она, япон қизлар шундай мафтункор,
Табиат зилолдек тиниқ юз берган.
Фақат кичкина бир камчилиги бор:
Бизнинг қизлар ўрнин босолмас экан.

Она, бу миллатнинг ҳурмати чексиз,
Келганлар миннатдор бўлмай кетмайди.
Фақат улар билан суҳбатлашсангиз
Меҳрга ўxшаган недир етмайди.

Она, мен мослашдим, уйқим беxалал,
Ҳатто туш кўряпман, ишонасизми!
Фақат xорижларни кўрардим аввал,
Энди кўраяпман қишлоғимизни..

Она, сакуралар гуллаган экан,
Сакура дегани биздаги гилос.
Фақат мевасини еб бўлмас экан,
Гулига тикилса бўларкан, xолос.

Гулига термулса бўларкан, xолос..


Япония, Кёто, 2015-йил март ойининг оxирлари.

Sevmasa sevmasin

Ishq aql intihosimi,
Qizlar dunyo g`avg`osimi,
Yo gunohlar jazosimi?
Sevmasa sevmasin go`zal..

Dardkash yolg`iz osmonmi u,
Hech amalsiz imonmi u,
Ishqsiz inson insonmi u?
Sevmasa sevmasin go`zal.

Bildim: oshiq tutqun ekan,
Oliy hiyla husn ekan,
Usiz yashash mumkin ekan!
Sevmasa sevmasin go`zal.

Muhabatim ustoz bo`ldi,
Achinmayman, xo`p soz bo`ldi,
Ayriliq zo`r parvoz bo`ldi,
Sevmasa sevmasin go`zal!

2013

Dalda

Meni kutar noma`lum hayot,
Barchasi sir, qiziqdir demak!
Bir kun topib qandaydir najot
Tuyg`ularga bo`lmayman ermak.

Faqat o`sha paytgacha (hayhot!)
Ozroq vaqt va zo`r bardosh kerak.

2013

Qo`msash

Sog`inaman gohi-gohida
Xayolimga sig`maganlarni:
Beo`y edim bola chog`imda 
Yoqtirmasdim yig`laganlarni.
Eng ko`p yig`lar edilar qizlar..

Yig`loqlarni suymasdim hecham!
Xayolimga sig`masdi: bir kun
Bir yig`loqi nafosat uchun
Umrim yarmin men isrof etsam!

Eng ko`p yig`lar edilar qizlar,
Yoqtirmasdim yig`laganlarni -
Beo`y edim bola chog`imda.
Xayolimga sig`maganlarni
Sog`inaman gohi-gohida..

2013

***
Қўмсаш

Соғинаман гоҳи-гоҳида
Xаёлимга сиғмаганларни:
Беўй эдим бола чоғимда 
Ёқтирмасдим йиғлаганларни.
Энг кўп йиғлар эдилар қизлар..

Йиғлоқларни суймасдим ҳечам!
Xаёлимга сиғмасди: бир кун
Бир йиғлоқи нафосат учун
Умрим ярмин мен исроф этсам!

Энг кўп йиғлар эдилар қизлар,
Ёқтирмасдим йиғлаганларни -
Беўй эдим бола чоғимда.
Xаёлимга сиғмаганларни
Соғинаман гоҳи-гоҳида..

2013

Ato

Bir sog` odam qolmagan go`yo,
Og`u ekan ishqning atosi.
Majnunlarga to`lgan bu dunyo,
Tuyg`ularning majruh xatosi - 
Havasni sevgi deb o`ylagan.

Hech sog` odam qolmagan go`yo,
Zahar ekan ishqning atosi,
Qurbonlarga to`lgan bu dunyo.
Xiyonatning jirkanch xatosi - 
Boylikni baxtim deb o`ylagan.

Shoirlarga to`lgan bu dunyo,
Ha! She`r ekan ishqning atosi.
She`r bitganlar barchasi go`yo
(Shoirlarning asriy xatosi) - 
Dildan sevaman deb o`ylagan..

2012

***
Ато

Бир соғ одам қолмаган гўё,
Оғу экан ишқнинг атоси.
Мажнунларга тўлган бу дунё,
Туйғуларнинг мажруҳ xатоси - 
Ҳавасни севги деб ўйлаган.

Ҳеч соғ одам қолмаган гўё,
Заҳар экан ишқнинг атоси,
Қурбонларга тўлган бу дунё.
Xиёнатнинг жирканч xатоси - 
Бойликни баxтим деб ўйлаган.

Шоирларга тўлган бу дунё,
Ҳа! Шеър экан ишқнинг атоси.
Шеър битганлар барчаси гўё
(Шоирларнинг асрий xатоси) - 
Дилдан севаман деб ўйлаган..

2012

Tush ta`siri

Uzoqdan bir ovoz keladi,
Quloqqa chalinar sadolar.
Qalbiga hokimlar kuladi,
Ingraydi ishqiga gadolar.

Tushimda bir ayol yig`ladi,
Tun bo`yi yig`ladi tinimsiz.
Kim ekan ma`suma, bilmadim.
Kimsiz siz, ey ayol, siz kimsiz?

Taqdirmi bu yo`lga boshlagan,
Qismatim yurakni qildi qon.
Sevgilim, senmiding yig`lagan,
Ko`zlarini ma`yus va mehribon.

Begona yerlarda kezaman,
O`zimdan uyimga yo`q xabar.
Yozaman, yoqaman, yozaman,
Maktublar tutaydi besamar.

Taqdirmi bu yo`lga boshlagan,
Qismatim yurakni qildi qon.
Onammi so`g`inib yig`lagan,
Ko`zlari ma`yus va mehribon.

Sizmisiz sog`inib yig`lagan, 
Yig`lagan sizmisiz, onajon?

2013

Charchash

Murdaga aylanib bormoqda ichim,
Ammo or qilaman shafqat so`rashga.
Sevgimni asrashga yetmagan kuchim
Yetarmikan hayot uchun kurashga..

2012

Berkinish

Mening kimligimni so`rama mendan,
Aytmayman, qistasang alday boshlayman.
Telba deyishlari ehtimol shundan - 
O`zligim yolg`onga ko`mib tashlayman.

Qo`rsligim sababin so`rama mendan,
Aytmayman, qistasang jerka boshlayman.
Telba deyishlari ehtimol shundan - 
Besabab qalbingni tilib tashlayman.

Sevganmisiz? - deya so`rama mendan,
Aytmayman, qistasang yig`lay boshlayman.
Telba deyishlari ehtimol shundan - 
Kimni sevishimni bilmay yashayman..

2013

***

Беркиниш

Менинг кимлигимни сўрама мендан,
Айтмайман, қистасанг алдай бошлайман.
Телба дейишлари эҳтимол шундан - 
Ўзлигим ёлғонга кўмиб ташлайман.

Қўрслигим сабабин сўрама мендан,
Айтмайман, қистасанг жерка бошлайман.
Телба дейишлари эҳтимол шундан - 
Бесабаб қалбингни тилиб ташлайман.

Севганмисиз? - дея сўрама мендан,
Айтмайман, қистасанг йиғлай бошлайман.
Телба дейишлари эҳтимол шундан - 
Кимни севишимни билмай яшайман..

2013