Энди бекатларда турмайман кутиб,
Сен ҳам шошилмайсан дарсларинг тамом
Бўлса.
Йўлим тушса ўқишинг томон
Xонангга термулмай кетаман ўтиб.
Энди бекатларда кутиб турмайман,
Энди совуқларда қолмайман музлаб.
Кўнглинг ўксиганда ҳолинг сўрмайман,
Сен ҳам келмагайсан меҳримни излаб.
Бекатларда кутиб турмайман энди,
Безовта қилмайман ўйларинггача.
Энди мендан бошқа, билмайман, кимдир
Кузатиб қўяди уйларинггача.
Энди бекатларда турмайман кутиб...
28.02.2017
***
Ajralish
Endi bekatlarda turmayman kutib,
Sen ham shoshilmaysan darslaring tamom
Bo'lsa.
Yo'lim tushsa o'qishing tomon
Xonangga termulmay ketaman o'tib.
Endi bekatlarda kutib turmayman,
Endi sovuqlarda qolmayman muzlab.
Ko'ngling o'ksiganda holing so'rmayman,
Sen ham kelmagaysan mehrimni izlab.
Bekatlarda kutib turmayman endi,
Bezovta qilmayman o'ylaringgacha.
Endi mendan boshqa, bilmayman, kimdir
Kuzatib qo'yadi uylaringgacha.
Endi bekatlarda turmayman kutib...
28.02.2017
"...Вақтлар ўтиб тушунасан, жуда ёшсан".
Маъюсгина жилмаясан кўзинг тўлиб.
Кўзёшларинг, кипригингни бир бор қоқсанг,
Тўкилади маржон бўлиб. Исён бўлиб.
Кимларгадир тўқнашаман - "Кўз қаерда?!"
Мен шошаман, бошқаларчи имиллайди.
Оламоннинг орасида, ҳар-ҳар ерда
"Севсанг керак!" - нималардир шивирлайди.
Термуламан автобуснинг ойнасидан,
Ёш бир бола бузиб ташлар ўйларимни -
"Севсанг керак!" - қулоқчинин орқасидан
Эшитаман қўшиғининг куйларини.
"Севсанг керак!" - бақиради шафёр чунон,
"Севсанг керак!" - қичқиради чиптачи ҳам.
Имлайди у, мен бораман бўлиб ҳайрон,
"Йўл ҳақини бермадинг-ку!
- Узр, акам".
...Xаёлларим мендан тортиб олар тунни,
Ва туйғулар бардошимни қилар эрмак -
Изҳорини рад этсанг-да, шу қизчани
Севсанг керак! Севсанг керак! Севсанг керак!
Муҳаббати рад этилган қизча, сени
Севсам керак.
Севсам керак.
Севсам керак...
26.02.2017
***
Jarayon
"...Vaqtlar o'tib tushunasan, juda yoshsan".
Ma'yusgina jilmayasan ko'zing to'lib.
Ko'zyoshlaring, kiprigingni bir bor qoqsang,
To'kiladi marjon bo'lib. Isyon bo'lib.
Kimlargadir to'qnashaman - "Ko'z qayerda?!"
Men shoshaman, boshqalarchi imillaydi.
Olamonning orasida, har-har erda
"Sevsang kerak!" - nimalardir shivirlaydi.
Termulaman avtobusning oynasidan,
Yosh bir bola buzib tashlar o'ylarimni -
"Sevsang kerak!" - quloqchinin orqasidan
Eshitaman qo'shig'ining kuylarini.
"Sevsang kerak!" - baqiradi shafyor chunon,
"Sevsang kerak!" - qichqiradi chiptachi ham.
Imlaydi u, men boraman bo'lib hayron,
"Yo'l haqini bermading-ku!
- Uzr, akam".
...Xayollarim mendan tortib olar tunni,
Va tuyg'ular bardoshimni qilar ermak -
Izhorini rad etsang-da, shu qizchani
Sevsang kerak! Sevsang kerak! Sevsang kerak!
Muhabbati rad etilgan qizcha, seni
Sevsam kerak.
Sevsam kerak.
Sevsam kerak...
26.02.2017
