***

Келдим, остонангда мен яна ҳозир,

Чиқасан қувончдан қизариб юзинг.

Югур, кел, энтикиб бўйнимга осил,

Фақат кўзларимга тушмасин кўзинг.

"Киринг" - тортқилайсан қўлимдан майин,

Ишвалар қиласан - "Соғиндим-ку, жоон".

Эркалан, ноз айла, меҳримга тўйин!

Фақат кўзларимга қарама, жонон.

"Ўлтиринг" - имлайсан. Бошла иккимиз

Ёлғиз мавжуд бўлган дунёйимизга.

Суҳбатлар қурайлик сўзсиз, сукутсиз,

Фақат нигоҳларинг қадама кўзга.

"Бунчлар xомушсиз, дардингиз олай", -

Оҳиста елкамдан қучасан, - "Xожам".

Бағрингга бос мени, йиғлаб юборай..

Фақат кўзларимга боқмагин, санам.

"Куйлайми, - сўрайсан, - xаёлингизни

Тарк этсин аламлар ва дилxун ўйлар.

Қайтарай баxтиёр жамолингизни".

О, шундай қил, эркам. Қўшиқ айт, куйла!

Куйла, сўзларингда муҳаббат оқсин,

Унутай дардларим ўзлигим қадар.

Овозинг кўксимда оташлар ёқсин.

Йўқ! Фақат дийдамга ташлама назар!

Тикилма кўзимга, нигоҳингни торт!

Унда ҳақиқатлар этади таъқиб.

"Севдим" де... дилимга ёлғонларни орт,

Яшай севилганлик ниқобин тақиб...

***

Keldim, ostonangda men yana hozir,

Chiqasan quvonchdan qizarib yuzing.

Yugur, kel, entikib bo'ynimga osil,

Faqat ko'zlarimga tushmasin ko'zing.

"Kiring" - tortqilaysan qo'limdan mayin,

Ishvalar qilasan - "Sog'indim-ku, joon".

Erkalan, noz ayla, mehrimga to'yin!

Faqat ko'zlarimga qarama, jonon.

"O'ltiring" - imlaysan. Boshla ikkimiz

Yolg'iz mavjud bo'lgan dunyoyimizga.

Suhbatlar quraylik so'zsiz, sukutsiz,

Faqat nigohlaring qadama ko'zga.

"Bunchlar xomushsiz, dardingiz olay", -

Ohista yelkamdan quchasan, - "Xojam".

Bag'ringga bos meni, yig'lab yuboray..

Faqat ko'zlarimga boqmagin, sanam.

"Kuylaymi, - so'raysan, - xayolingizni

Tark etsin alamlar va dilxun o'ylar.

Qaytaray baxtiyor jamolingizni".

O, shunday qil, erkam. Qo'shiq ayt, kuyla!

Kuyla, so'zlaringda muhabbat oqsin,

Unutay dardlarim o'zligim qadar.

Ovozing ko'ksimda otashlar yoqsin.

Yo'q! Faqat diydamga tashlama nazar!

Tikilma ko'zimga, nigohingni tort!

Unda haqiqatlar etadi ta'qib.

"Sevdim" de... dilimga yolg'onlarni ort,

Yashay sevilganlik niqobin taqib...

07.01.2017